投資的我與投機的我

以下係我睇完轉載自頭條日報的中環 High Tea的感受。
在這個喪升的日子，新股熱升溫，大家都想炒桶金返屋企過一個開心的聖誕，但風險一定要衡量，贏了故然開心，也要有輸的心理準備。
在全民皆股的情況下，不入市，又好似白白睇著機會流走，入市，又有一定風險，所以一定要避重就輕。抽新股，我也不會盲目地入紙，我也會看看該股是做什麼生意，有沒有什麼往積可作參考。例如中人壽及平安保險往積好，我抽了民安 (22號上市)。又例如和黃做 3G 都蝕到仆街，所以我沒有抽中通 (升了差不多 100%)，又例如胡應湘做內地基建做到損手爛腳，所以我沒有抽中交建 (升了差不多40 %)。
又正如陸生所講，賺不了，也不要蝕，炒要炒得有技巧，不要做了大戶點心。師父東尼都有教，買股，一定要嚴守長中短線目標，不要隨便改目標，由短炒變長渣，大忌也。短炒有賺，有信心，可以推高止賺位，睇不通，也可以沽，但沽了，睇見隻股再升，又不要覺得不值，又不要心思思想入返。
其實現在最好的做法，就是一邊儲彈藥，一邊找尋優質股，到大市下滑，再長渣優質股，那就戰無不勝。

原文如下:
中環High Tea——投資的我與投機的我
2006年12月11日

　　 股市進入喪炒之時代，從新股股價亦知一二。上周五，三隻新股一齊上市，招金（1818）升26%，奧普（477）升32.4%，最誇張是隻中通服（522）狂升85.5%，散戶闔埋眼買新股都贏錢，簡直好似有跌錢黨到處派錢一樣，唔執就笨。
　　 千萬不要以為我叫你唔好去執，上面提到「跌錢黨」三個字，好似講執錢就會受騙那樣﹔我的意見剛好相反，只要心態正確，這些錢絕對可執。

　　投機咪扮投資

　　 網友小潘最近逢新股都抽幾手，隻隻抽中一點，帳面獲利不少，又有點怕，問「係咪話我咁抽新股法有問題呢?我係咪應該停一停呢﹖如果是，我會聽你說，即使賺少也不會怨，最緊要唔好蝕。」

　　 陸羽仁的簡單答案是﹕如果你知道自己在投機炒股，毋須要停，新股可照抽。

　　 我的理論是人有「兩個我」，一個是投資的我，一個是投機的我。常人最易犯的毛病，是把投機當投資，甚至明知是自己在投機炒股，但怕醜唔想認，打電話到電台或寫電郵到報紙問功課，開場白一定係﹕「我抽這隻新股想長線投資，唔知抽唔抽得過……」遇到一個好老實的主持人或講股佬，就會話「上市價好貴，認唔過」。咁就弊傢伙，隻一上市升85%，問功課的散戶心諗，你呢個主持又話貴，正衰人，累我輸錢（其實是賺少）。

　　 我的建議是散戶想炒要認，認清楚是「投機的我」在入市，既可尋求合理指引，亦可理順自己出入市的目標及手法。

　　新股狂升只因喪炒

　　 陸羽仁都識唔少投資銀行家，有時傾起上市公司上市時的定價，投資賓卡普遍意見是上市價是照顧了市場當時情況的合理價﹔因為公司上市，公司老闆當然希望定價愈貴愈好，但投資銀行要包銷股票，若去唔到貨要自己啃，所以要壓價，雙方爭持之後，才定出上市價。所以上市價本應是照顧了市場熱度的合理價格，特別是體積超大的公司要上市，出貨量大，再賣平少少更合理。

　　 如果上市價合理，如何解釋一隻新股上市第一天可以升85%﹖當然你可以提好多內地發展3G無線電話等理由，但我認為理由只有一個﹕喪炒。

　　 另外也可以從投資數字來講講升85%的「喪」度。彼得林治講過，有散戶期望投資的股票一年升30%，林治覺得對方傻傻地，話以咁速度，幾十年可以把成個美國買下來。我們好景仰的股神巴菲特，他的投資組合多數有近30%年回報，已經令他成為全球第二富有的人（第一是微軟的蓋茲）。

　　 我以前用「七十二律」計過投資組合的複式增長數字，可以抄出來再看看﹕「如果年增長30%，即是2.4年可以翻一番，用22總投資年期來計，1可以變成512，即係話你今天有10萬，22年後有5120萬﹗5000萬富翁，Bingo﹗

　　 咁都唔夠開心，再講開心的，如果有年增長50%，1.44年翻一倍，22年後，1會變成32768，即係你今天投資10萬，22年後就有32億﹗﹖嘩，有無計錯數﹖不過就算計錯都無所謂啦，即使計少個零，都有3.2億，都係天文數字。」

　　 好多人有10萬、20萬在炒新股，呢隻升85%，那隻升30%，不用一年，只等兩三個星期回報都有50%（理論上，如果一直唔輸，做22次賺50%的動作，複式計算就有1變3萬的效果），咁咪好易有幾十億身家﹖

　　熱番薯　要拋之

　　 計完數大家應該明白，這種新股回報，只屬超乎尋常的喪升，當然不能保持22年，甚至講衰的，而家喪升完，就有喪跌的一天。不過話得說回來，用「投機的我」心態來買新股，食這個喪升之浪，進退有度，亦都無壞。

　　 「投資的我」買股票是長，如果清楚知道自己買了好股，入貨價又夠平，可以長不放，一二、三十年不理它，甚至逢低增持，絕對是好事，這樣可以避免在貴時買，在平時沽。當然如果買入的只是雞雞地的股票，入市價又是在中高位，就不要輕言長了。

　　 「投機的我」就完全相反，入市心態只是短炒，將隻股票當作一舊熱番薯，經常想將隻股拋走就差不多，因為明知買得貴，貴買只為貴賣，才是短炒賺錢之道。最好方法是定止賺位，比現價低10%就沽之，股價一路升，就一路將止賺位上移，希望可以賺盡一個直線向上升浪的波幅。

　　只怕無錢　唔怕無股

　　 唔識止賺，甚至唔同意止賺的朋友也要注意，不止賺唔緊要，一定要止蝕，買新股以入市價為止蝕，最好事先講定畀經紀聽，一跌到入市價就幫你沽，不要輸畀佢，才是保命之道。

　　 散戶一般不喜止賺止蝕，是因為止賺止蝕完股份可能立即升，結果十分心。當然，懂得止賺是要承受止賺完再升之痛，不懂止賺就要蒙受最後一跌之險，上天十分公平。而且旺市買新股止了賺，沽了再升也無所謂，只要大市繼續旺，大把新股排隊上場，只怕無錢買，唔怕無股買。

　　 做「投資的我」容易，做「投機的我」想成功其實有難度，因為入市買股雖然大部份會升，但你一日不賣，只是紙上富貴。到股市喪升後回落時，通常都會回得幾急，一般人就算明知有止賺止蝕的方法，但大多數執行時走晒樣，跌來想睇，睇睇就變長，將「投機的我」，當作「投資的我」，最後一倉都是蟹貨。

　　 有個股壇老雀講過一番話，我認為好有警世作用。他認為在熾熱的市道炒股，大家都在鬥最後一刻離場，正如占士甸和人鬥跑車衝向崖邊，太早停就輸了，太遲停仲慘，會跌落崖粉身碎骨﹔大家明知有危險，但想賺盡最後一蚊，最好一沽清就大跌市仲好﹔老雀話這種心態要戒，投機者離場才是勝利，唔好賺盡，諗得毒一點，留番點水位俾後來那個傻仔接貨吧﹗聽落有點心寒，但在這個市道炒新股，若不心狠手辣，傻傻地去「投資」死，我就勸你唔好落場玩了﹗

　　陸羽仁

參考資料 / 來源
(1) 頭條日報
http://www.hkheadline.com/news/headline_news_detail_columnist.asp?id=16433§ion_name=wtt&kw