男人狂花 女人死得

金融High Tea——男人狂花　女人死得
2007年3月26日

　　 最近看到一些網上評論，講起女人搵老公的標準，其中一個題目是男人願意在女人身上花幾多錢。當男人願意將最大比例的身家花在女人身上，買畀女人，這種男人就是好老公。一個只得好少錢，但係肯將三分一身家買隻鑽戒俾女友的男人，就好過一個身家好厚，但不願花萬分之一身家買鑽戒的男人。
　　 或許這是現代女性擇偶的條件，在一個消費社會，如果嫁個孤寒老公，唔肯大手筆送禮物畀老婆，返工無番幾件名牌襯，會覺得不如唔好做人。不過陸羽仁拿得出來講，當然唔係好同意，認為在現代社會，洗腳唔抹腳的人，不論是男人女人，都唔係好「棧」，而且洗腳唔抹腳的定義，不止是買鑽戒買名牌，豪賭股票賭波賭馬亦完全一樣，有令你貧困的終極效果。

　　贏者全勝 輸家慘情

　　 講這個問題要從好宏觀的角度講起，現代社會是「贏者全勝」的社會，對條件普通的人極之不利。陸羽仁在早兩期講到全球化帶來的問題，話香港慢慢出現M型社會，即係兩頭大，中間細﹔香港自覺係中產的人好多，但真正屬中產階層的市民正慢慢減少，財富同時向上或向下流動，中產若不能掙扎到向上流動，就會向下流，這就是日本作家三浦展講的「下流社會」。

　　 下流社會的主要原因是全球化，過去是「塘水滾塘魚」的社會，一個地區自成體系，當地經濟好時自然缺人做，打工仔人工就水漲船高，自從90年代蘇聯解體，國家間的藩蘺瓦解，各大國之間的貿易壁壘解除，出現全球化現象，西方打入發展中國家的市場的同時，發展中國家的人力資源走進世界市場，客觀上每一個地區的打工仔，都面對全世界人都來搶緊你份工，你話大唔大鑊。本地公司要做大、要生存，亦要接受全球化的規律，把工序搬到或外判到平價地區。若你做的工序容易外判或轉移，面對全球化的壓力就好大。

　　全世界搶你份工

　　 人力資源全球化的同時，生意亦全球化，資金亦全球化，總之大資金、大企業就向全球擴展，你自己或你的公司若果搶唔到全球的生意，就會畀全球的公司搶走生意﹔你投資若搵唔到錢，就阻止唔到全球的大鱷來搶你錢﹔你若果不是在消費行業賺緊錢，就好可能在愈來愈發達的品牌消費中花掉很多錢，又或者搵錢和使錢兩件事同時發生，睇你搵得快還是使得快。

　　國際大鱷搶你錢

　　 好似投資市場，你睇呢個月5號發生恒指單日跌777點慘劇，期指仲跌到911點，咁驚人的跌市，逼所有造好倉的人打靶。這種單日暴跌，唔係一句市場信心好弱可以解釋到，特別是期指市場跌得咁厲害，無大資金力插，又點可以擺出一個咁勁的殺局﹖陸羽仁不是做事後孔明話有貨應該唔沽，若果我有好倉在手，明知係殺局都要焗沽，在那種環境唔止蝕控制風險，隨時輸得更甘，你點知唔會跌多1000點﹖股市弱肉強食，散戶無論睇好睇淡，在這種好易上落1000點的股市，都好易做點心。這是一個環球大戶食大茶飯的世界。

　　 又講消費市場，唔知你有無發覺，愈來愈多世界一流的品牌，來港開旗艦店，它們在中環、銅鑼灣、尖沙咀佔據大舖，裝修到金璧輝煌，對唔往，主要唔係為做香港人的生意，他們深知有好多自由行的大陸客來港，有些大豪客會狂掃名牌，所以這些世界級品牌就來港開旗艦店，主要針對這些自由行的貴客，裝修得富麗堂皇的店面，本身就是一個品牌宣示，等如做了一個大型的戶外廣告，告訴大陸客它們的品牌有幾巴閉。

　　 這些時裝名店，本來不以本地人為主要對象，但你路過貴境，俾佢地豪裝吸引，行入去睇，忍唔住買，好容易一兩個月人工就無晒，呢叫做誤傷無辜。

　　全職炒股唔易做

　　 做事又係，投資又係，連消費都係，依家全世界都搶你錢，你定力小 D 都死。陸羽仁在網上講到年輕人搵錢和投資的問題，惹來網友回應，有些事例都幾發人深省。

　　 網友「阿不子」的故事是這樣﹕「我在03年大學畢業，當時搵工好難，我幾經辛苦才入到間上市大公司工作。一開始人工只有3000元，仲要做餐死，朝九晚四（凌晨），工作極緊逼，上司又惡，一個project要2小時交貨那種（同樣工作，今時今日就會畀一星期限期）。但我無得揀，因為欠政府10萬元學生資助，唯有夾硬做，望守得雲開見月明。終於，同我一齊入職的30個新人，有22個都被嚇走了。之後，我人工就加回正常水平，幾加拼搏，2年後，所有同期的新人都走了，然後我就調到較好的崗位，可以做自己喜歡的工作。表現雖受好評，但因公司連年虧損，工作了4年，人工仍是4位數字。要還債，要交租，省吃儉用都不能有積蓄。