贏粒糖 輸間廠 (1)

大市高位略回後牛皮，話咁快又到期指結算前兩天，睇吓係唔係在咁上下水位結算。

　　陸羽仁看見網友們早兩日討論沽貨得太早的問題，好多朋友都有好股沽得太早，衰股沽得太遲的經驗，點解呢？

　　 幾個網友K，CWH和路斯伯都講過自己將好股放出街「游水」的失敗例子(好多人都試過，包括陸羽仁在內)，不過網友路斯伯的情況幾典型，佢係咁講：

「我以前係一個好保守既人, 經常齋睇唔敢買, 錯失好多機會，曾經買過既好股如 #386中石化 等, 其實幫我賺過錢, 不過每次都因為蠅頭小利而賣出, 賣出後又唔肯以高於賣出價追回, 結果一去冇回頭..... (兩年前我以 $2.75買入6000股 #386, 06年初以 $3.75賣出, 呢次係我睇一次參與股市)

「唯一一次輸大錢係因為#1063 新確, 剛剛買賣幾次贏得小利後, 就以為自己好醒, 所以以 $2.3買入12000股後, 初期有微利但冇賣出, 後來不停下跌, 跌至 $1.5水平都唔止蝕, 然後因業績問題, 有一天裂口低開 $0.7X, 我都唔認輸, 後來再因供股再度裂口造$0.3X......最後以$0.4賣出......此一役輸了2萬多元, 我又變得膽小, 所以2006年底既升浪我並冇受惠。」

　　　路斯伯的情況，就是典型的「贏粒糖、輸間廠」的故事。要防止類似慘劇在自己身上再發生，大家要細心研究慘劇發生的每一個細節。

　　表面上看，有這種行為的散戶十分膽小，他們不敢去贏，所以贏少少就走，怕再坐落去會輸，但如果散戶的特點是膽少，怕輸，為什麼他們輸的時候卻夠膽死守，守到自己「輸間廠」呢？

　　我會把散戶分成兩大類，第一類是瞓身喪賭型，這類人賭會賭到盡，贏又贏死，輸又輸死，可說是「贏間廠，輸間廠」，這類人佔較少數，輸起上來會輸身家。

　　第二類是膽少身痕型，這類人有少少賭博因子，因為無賭博因子的人不會炒股票（好少有人好似陸羽仁無乜賭博因子把炒股當做學術研究，一笑），無賭博因子的人會把錢拿去存定期（陸羽仁的太座就係呢類人），所以有點賭博因子，少少身痕，就會去買股票，賺少少又好騰雞即刻走。這類股民佔大多數，香港股市普通旺時有二十萬股民，旺市時有五、六十萬，在股市熾熱時，吸引大量自稱「新仔」的物體涉足股場。「贏粒糖，輸間廠」就是這類人面對的最大危險。

　　敢輸唔敢贏表面上看是一種奇怪心理，其實內裏有一種心理貫，「膽少身痕型」的散戶怕輸，所以贏少少就走，鎖定利潤；但輸時唔肯走，想死坐坐番的錢番來。

　　先講「贏粒糖」，有好幾種情況，第一，有些散戶「以前」買股好少贏，一見到贏就好高興，無幾耐就即係走。第二，新仔入場遲，愛高追，好多時贏少少唔沽跟住就輸番，試過一兩次，以後一有利潤就閃。第三，散戶心理質素好弱，亦唔識分好股壞股，即使揸了好股，亦好易在大戶玩震倉時被震走。

綜合而言，散戶炒炒吓，有一百個理由買了好股都揸唔長。所以巴菲特低買好股長揸法，是對應散戶心理弱點的最好方法，低價買入好股，一直死揸下去，直至公司質素惡化才沽出，這是「投質的我」的做法。

你話我都係想做吓「投機的我」，有乜方法防止「贏粒糖」呢？我沒有捷徑可以提供，但基本手法是「順應大市，避免高追，食盡升幅」，首先要對大市有一個基本睇法，即使並唔係好準確咁估到大市（估到做期指、期權可以好發，不過散戶一般無咁o既本事，好易成為大戶點心），但起碼要知大市的大方向，然後順應大方向行事，例如你見恒指在２００００點至２１０００點牛皮咗咁耐，無理由一升就玩完啩，咁短期大市仍向上，你可以順應大市去做。

講到避免高追，你知我好唔鐘意高追（剛開始升時追貨是例外），就算大市向上，短期升得太急時，即使大市不回吐，自己買的股份一個短浪回吐，隨時唔見８至１０％，又唔知止唔止蝕好，不如等佢短浪回吐時再吸仲好，或許有時咁買貨買來的貨更貴，但避開一買就大幅回吐的風險。而且成日高追中伏，捱價一排，後來一升就會想沽，這根本是經常錯位入市訓練出來的壞習慣。

至於食盡升幅，就更加唔使我教，在升浪中唔好過急睇淡出貨，有時牛皮幾個月就係等呢個浪，浪一來會把一切浮高，不要被過去幾個月沉悶氣氛所蒙蔽，大戶造市，跌又跌得急，升又升得急，有利潤在手，不妨坐吓，等大市升浪行得深的才出貨，至少也用不斷推高止賺位出貨，以免真係遇上一個直線急升的走勢時，自己都食唔到。

（明天再講「輸間廠」之情況）

陸羽仁 on 27 June 2007
http://www.hkheadline.com/blog/reply_blog.asp?f=5YTPBH5B812303&id=42650&catID=&keyword=&searchtype