購物策略

　　　港股一過期指結算，就急升３４１點，期指更由早幾日一直低水，拖住現貨向下，變成高水，拖番現貨向上，我就話「人為」味道極濃。

　　部份網友不知期指運作，我又搵唔到好書啱大家睇，唯有自已講多兩句。我成日講「現貨」即恒生指數，由於恒生指數由恒指成份股構成，所以這些成份股的升跌，造成恒指的變動。「期指」即恒生指數的期貨，理論上期指會跟恒指的走勢，但現實上期指比恒指會出現「高水」、「低水」。期指比恒指高水，即是期指點數比恒指點數高，以昨天恒指收市價２０６３４點計，期指收２０６９３點，即係期指高水５９點。所謂期指低水，是指期指價比恒指價低，假設期指昨天收市價是２０６００點，恒指價不變，仍然是２０６３４點，期指就變咗低水３４點。

　　現實上期指雖然是恒指的衍生產品，但期指的高水、低水會倒過來影響恒指，例如突有人大力沽１０００張期指，期指急插，恒指立刻會跟住插，因為買賣現貨者見期指咁跌法，就會認為有大戶唔睇好大市所以才大力沽期指，就會跟住沽現貨迴避風險，反之期指急升的情況亦係一樣。

　　我話期指一過結算日就由低水變高水，有人為因素，皆因表面觀之，過去幾日期指一直低水，代表的炒作者一直唔睇好，點解突然變得咁睇好，購買力咁強，強到令期指由低水轉高水？這種轉變過份突然。

　　你叫我估原因，就係好似昨日咁講，大戶沽５月期指、同時揸６月期指，所以一直壓價直到結算日。我仲估多一樣，就係最後因大陸加印花稅的一跌是阿爺送俾大戶o既，大戶食埋唔使講多謝，令結算日大市跌「突」咗。我自己估，大戶壓住大市，令期指在２０５００點結算都收貨o架啦，但你整單印花稅跌多的，都唔拘，結果結算日恒指收２０２９３點，恐怕都「跌突」咗２００點。

　　所以唔好覺得昨日升３４１點升好多，扣除這「跌突」的２００點，其實升咗１４０點，唔算太多，若果我這個世紀預言無錯，恒指仲可以升，先升番上２０８００點樓上浮游吓，到月中不排除又試吓高位。

　　散戶落雨時唔敢買嘢，到好猛太陽時又覺得自己手上無嘢好孤獨，忍唔住去高追，變成平時唔買貴時買，即使大市向上，但暫時未到大升時，都只會是波動向上，你一高追佢又回吐，好易將你震走。更慘者是遇上年頭國壽（２６２８）一役，唔係回落時俾人震走，而係根本中哂伏，當時散戶信氣氛，高追五行三保，結果以國壽為首的幾隻大陸金融股一直無好過，股市旺番，又轉咗炒其他嘢。

　　其實散戶其中一個大毛病，是沒有大方向，其實不知道自己想唔想買嘢，攞住錢走入街市漫無目的行一轉，跟住矇查查又走番出來，最慘就係如是者行了幾轉，到天都就快黑才落手買嘢，又睇唔到檔主其實想收檔的心態，價都唔講，照舊按貴價同檔主買嘢。

　　如果你覺得２０６３４點的股市已經好貴，覺得股市就會爆，基本策略應該唔買嘢，日日上這裏睇吓嘢，吹吓水就算。唔買嘢的風險是股市最後竟然大升，自己走寶，十分揼心，所以唔買嘢亦有唔買嘢的風險。

　　換一個角度，如果你覺得２０６３４點還有上升空間，覺得大市雖然高，會未會咁快爆，基本策略應該搵機會買嘢，好似早兩日跌市，就係買嘢的機會，最好係分段買，所以早兩日黑色星期三早上阿Ray問買得未，我就即刻話，想買就要開始買。如果判斷大市跌到２０５００點應該OK，把注碼分３注，２０５００點買第一注。好衰唔衰，真係咁黑，一買就整單印花稅，再跌，在２０３００點就買入第２注。一不離二，二不離三，衰起上來會愈買愈低，買得第二注，就要預咗要跌到２０１００買第三注，三注買齊，等如平均價在２０３００點的水位買貨，然後定一個止蝕價，買完即使反彈，但再跌亦都唔奇，但買價夠平，止蝕位可以定得低的，觸及止蝕位要離場的機會大降。

　　若跌到咁上就唔跌，買得２注，大市回升，若確認升勢，就即時追第三注，若在昨日２０５００點左右追第三注，平均成本是２０４００點左右，防守力都幾好。無論如何，買貨預咗輸，諗好什麼位止蝕，唔好以為自己咁叻一定估得中，不過低吸總比高追安全。（我只是講大市和大股，不是講細價股，細價股早已炒到大西洋，正如我在頭條日報專欄所講，隻隻細股有不同的消息，有些炒資產折讓，有些炒新生意，總之自己執生，到咁上下沽吓收番的本一定無錯）。

　　正如天雨買嘢，都係一樣，唔好見人減價，由４元一斤菜，減到２元，你仲話想等到１元才買，結果檔口都收埋，明天起身又是另一個世界，你以為明日黑色暴雨，點知出猛太陽，個菜販又賣番４元一斤，你買好定唔買好？

2007/6/1 上午 09:30:49
陸羽仁

discuss